Die Verhaal van Tommie Tarentaal deur Thomas Vermeulen

Thomas Vermeulen se kinderboek, Tommie Tarentaal en Jorg die vreemde Jagspinnekop, se kleurvolle omslag trek dadelik die oog. Ons maak kennis met spesiale voëltjies, 'n perdeby en ander gediertes soos Jorg, wat in die groot Afrika bos woon. Daar is Ruben die rooivink, Tommie Tarentaal en sy mamma, Freddie die visvanger en Wouter die perdeby. Dan gewaar Ruben vir Jorg, die groot vleisvretende jagspinnekop. Ruben besef dat sy mater, Tommie in groot gevaar verkeer en vlieg dadelik na Truida, Tommie se mamma om haar te waarsku. Intussen het Tommie agter 'n skoenlapper aangehardloop dat hy skoon verdwaal. Wat sal hy voor hom sien toe hy besef hy is ver van sy mamma af? - Jorg, en hy lyk sommer baie lus vir dié klein tarentaaltjie. Met 'n vindingryke plan kry Tommie dit reg om van Jorg af te ontsnap. Dan volg daar skreeusnaakse gebeure, soos die vriende planne beraam om van Jorg ontslae te raak. Gaan hulle dit regkry om Tommie veilig te hou of gaan hy spinnekopkos word?

Ek wil die skrywer gelukwens met hierdie oulike boek waarvan hy die volkleur illustrasies self gedoen het, wat 'n visuele fees is. Die bladuitleg deur Mariska Kemp is besig en modern. Die pittige sêgoed van die gekose karakters is uitstekend én lok heelwat reaksie uit. Die boekie bevat drie hoofstukke wat opmekaar volg. Die kinders sal mal wees oor hierdie uitsonderlike karaktertjies, met hulle vars en kreatiewe taalgebruik. Hierdie unieke boek behoort kinders se verbeelding aan te wakker en jonger lesers kan hieruit hulle woordeskat en ervaringshorison uitbrei; met die insette van hulle ouers of voorlesers. Ek het gehou van die skrywer se skryfstyl en daar is goeie afwisseling in die teks. Hierdie boekie behoort self lesers se aandag te hou en hulle sal dit geniet. Dit is in 'n lekker verteltrant geskryf en die ontknoping het 'n verrassende einde.

Dit was vet pret om hierdie keurige boekie te lees. Oud en jonk behoort hierdie boekie, wat die moeite werd is om te lees, te geniet.

RESENSENT: A Hills - Onafhanklike Resensent van Afrikaanse boeke